បាត់ដំបង៖ យោងតាមរបាយការណ៍ពីសមត្ថកិច្ចបានអោយដឹងថា កាលពីរសៀលថ្ងៃទី០៨ ខែឧសភា ឆ្នាំ២០២៣ ខេត្តបាត់ដំបងមានភ្លៀងធ្លាក់មួយមេលាយឡំជាមួយខ្យល់កន្ត្រាក់ផងនោះ បានបក់បោកគ្រប់ដណ្តប់ទៅលើភូមិសាស្ត្រជាច្រើន ដែលក្នុងមានស្រុកចំនួន២ បានរងផលប៉ះពាល់ក្រោម ឥទ្ធិពលខ្យល់កន្ត្រាក់ធ្វើអោយខូចខាតផ្ទះប្រជាពលរដ្ឋចំនួន ៦៦ខ្នង ក្នុងនោះសាលារៀនមួយខ្នងផងដែរ។

របាយការណ៍ដដែលបានបញ្ជាក់ថា ក្នុងចំណោមផ្ទះប្រជាពលរដ្ឋដែលរងការខូចខាតដោយខ្យល់កន្ត្រាក់ខាងលើ ក្នុងនោះមាន! /ស្រុកភ្នំព្រឹក រងការខូចខាតសរុបចំនួន ៦១ខ្នង ក្នុងនោះខូចខាតទាំងស្រុងចំនួន ៥ខ្នង ខូចខាតរោងនិងតូបលក់អីវ៉ាន់ចំនួន២ /ស្រុកគាស់ក្រឡ ចំនួន ៤ខ្នង និងសាលាមត្តេយ្យ ១ខ្នង តែមិនបណ្តាលអោយមានគ្រោះថ្នាក់ដល់មនុស្សឡើយ។

ក្នុងករណីគ្រោះធម្មជាតិនេះដែរអាជ្ញាធរ ក៏ដូចជាមន្ត្រីជំនាញ បាននិងកំពុងពន្លឿនក្នុងការចុះជួយរៀបចំរុះរើនិងជួសជុលជូនប្រជាពលរដ្ឋ និងធ្វើរបាយការណ៍ដើម្បីរាយការណ៍ជូនដល់ថ្នាក់ដឹកនាំផងដែរ៕